昨日出版嘅日本爆料雜誌《Friday》，偷拍到日本殿堂級結他手布袋寅泰，與女星高岡早紀以「雙重不倫」嘅身份偷食嘅相。
據《Friday》所講，喺六月嘅一個晚上，布袋約咗高岡到六本木一間意大利餐廳內撐枱腳，布袋重為高岡叫咗支白酒㖭。但食完飯兩人重嫌未夠喉，所以到十一點左右，佢哋再到另一間酒吧談心。兩人喺酒吧裏面態度親密，喺昏暗嘅燈光同浪漫嘅音樂環境底下，兩人忍唔住跳起舞上嚟。情到濃時，佢哋更不理旁人嘅目光激吻一番。到凌晨時分，布袋送咗高岡返屋企之後再搭的士回家。
其實今次已經唔係布袋寅泰第一次喺出面搞搞震。喺九七年，佢就因為搭上日本女歌手今井美樹而與前妻山下久美子離婚，喺九九年與今井結婚之後，亦曾因為替江角真紀子監製唱片而傳出緋聞。估唔到佢跌穿頭康復冇幾耐，又因為幫高岡早紀主演嘅電影《欲望》配樂而忍唔住再次出外偷食。
布袋寅泰事後就話自己只係一時飲大咗，原來佢已經同佢老婆今井備咗案。至於高岡早紀就話丈夫保坂尚輝亦經常唔返屋企。睇嚟今次都算係姣婆遇着脂粉客咯。