美股周四表現唔算太差，亞洲股市只係個別發展，但芬佬再次憂慮中國宏調力度可能加大，港股一度跌近300點，11800曾失守，最後收報11855，跌227點，成交增加至153.46億元。
講起宏調力度，噚日中行公布，5月份對五大過熱行業的新批放款較4月大跌46%，反映中央以行政指令形式來收緊信貸的力度相當強勁，但成效如何仍有待觀察。不過值得留意是人行最近做過一項調查，顯示民眾對物價急升不滿程度增加，亦嫌存款利率偏低。中央或多或少都要照顧一下平民百姓的心情。
遠東生物制藥（399）周四跌逾90%後停牌，但事件餘震噚日才開始，浙江玻璃（739）早市一度被掟低70%，低見0.55元。不過，低位有人接貨，急速反彈，最後收報1.55元，跌幅收窄至14.4%。若果能在低位買到貨，收市計每股賺1元，回報率達1.8倍，認真係大豐收。
雖然大家同屬民企，但遠藥有事，唔等於所有民企都出事，何解浙玻會急跌呢？黑客話，遠藥與浙玻當然冇直接關係，但弊在浙玻有個幫莊，聽講同樣係遠藥嘅幫莊，幸好呢個炒家持貨唔算多。
市傳平安保險（2318）招股，以10.33元定價，即略低於招股價範圍的中間水平。不過，據聞芬佬仍嫌貴，加上認購情況較芬佬預期為差，相信超額倍數唔會高，令到平安保險首日破底機會大增。
普施基因（8250）首日掛牌收0.40元，低於招股價20%。據講此股主要由友好人士持有，街外貨唔多，噚日亦唔見太多人要出貨止蝕，全日成交只得145萬元。但由於友好人士唔係炒家，未必會出嚟托價，想博反彈就無謂揀佢。
阿虎