海外車訊：<br>三藩市試日產MVP房車格局玩高檔

海外車訊：
三藩市試日產MVP房車格局玩高檔

今趟三藩市之行，筆者能夠跟世界各地汽車傳媒參與Nissan360試車大會，唔單止有機會同場認識到廠方近70款日產跟Infiniti最新產品，其中最難得嘅係試到部最新款、走高檔次房車格局嘅Presage七人豪華多用途車，呢部係繼香港車迷熟悉嘅旗艦級Elgrand後日產最新MPV，就等呢部第二代Presage有機會來港前俾大家先睹為快！

記者、攝影：陳偉林

房車化設計易受落
唔講唔知，原來日產除卻有輸港的Prairie、Serena及頂級Elgrand三款不同級別的MPV車外，介乎後兩者之間，東瀛本土重有一款體型媲美最新本田Elysion，同樣走房車化的Presage七人多用途車。自1998年首度登場以來，去年6月Presage更推出全面革新的第二代新版；驟眼看，新車低斜的車首鋪排，有點酷似Cefiro之餘，一對特大HID大燈亦有型有款！其次，Presage不到1.7米車高更有利進出室內停車場外，左右雙趟門配搭亦方便乘客進出車廂。

■三藩市試車場幾近有70款各式車種任意測試。

座椅放平騰出近倍空間
這輛Presage另一個賣點，可會是車廂三排七座位組合，雖然筆者揸嘅只係絲絨配搭，但頂級版就有真皮同桃木裝備，內裏既有Walk-through方便之餘，中、後排遇有需要還可以整幅放平，以騰出近倍容量；再者，有齊前後獨立送風的恒溫冷氣、原廠高級音響，重有獨立照明裝備。置身其中，除咗好有空間感，座椅重好有承托力。

無段變速波箱起跑有力
日產Presage共分有2.4公升入門版及頂級3.5公升型號，而今趟試車嘅正正係後者。在匹配上一套CVT無段變速自動波箱後，引擎表現在起跑至加速時尤其明顯，難得在低重心穩紮的車架及底盤輔助下，行車走彎循迹性高又穩妥，加埋多套電子主動式裝備，承繼了7人車嘅安全特性。

電鍍尾門
1.兩旁門邊電鏡前設小窗，令視野變得更廣闊。

2.大幅面直立式尾燈設計，令隨後車輛有明確訊息。

3.車尾門板有電鍍裝飾外，兩旁還置有白底倒車燈。

最Buy位

■鍵盤式中控台:鍵盤式一體化中控台組合，有齊冷氣、音響設備外，重有下方CD匣裝置。

■中置式CVT無段變速自動波箱，椅間有Walk-through方便。

貴氣座艙

■即使未平放前，呢部七座位車尾廂都有充裕空間擺放雜物。

■當後排整幅收摺平放後，比之前載物空間多近倍。

■車廂鋪排簡約得嚟加有桃木修飾，貴氣得嚟又有啲轎車風範。

■前排之間備有大型活動摺几，重有杯座組合。

■前後三排座椅用上軟滑絲絨組合，乘坐軟滑貼服。

■左右電趟門:中排左右雙電趟門設計，乘客上落好方便。

■車燈角度調校:駕駛席旁備有車燈角度調校、門邊電鏡開關等按掣，就手易用。

■中央頂置表板組合，睇落尚算清晰。

NissanPresage3.5V6Profile
引擎：3498ccV6DOHC
馬力：231ps/5600rpm
扭力：34.0kgm/2800rpm
傳動：CVT無段變速自動波，4前輪驅動
懸掛：（前）麥花臣支柱
（後）多連桿
制動：（前）透氣碟
（後）碟式（ABS）
輪胎：215/65R16YokohamaAspec
尺碼：4840×1800×1685mm
軸距：2900mm
車重：1770kg
平均耗油：8.2km/L
查詢：合誠汽車（23688235）

《車主》雜誌James講幾句
「我鍾意速度感，揸日產Presage就畀到我有澎湃有勁嘅感覺，引擎表現出色，操控方面亦好順暢，車廂鋪排有時代感，重出奇寬敞。」

副總裁有嘢講日產海外市場及銷售部副總裁宮谷正一
「我認為近年廠方不斷精益求精嘅策略，不單止有助成本效益，同時間重可以開發多個更能迎合用家口味、既可靠又出眾嘅車款。我預期日產汽車嘅海外銷售量隨後會有大幅增長，而一向係世界汽車窗櫥嘅香港，廠方亦正計劃推出多款新車以迎合需求！」














其他同級MPV之選

本田Elysion3.0V6
點睇：炙手可熱又至新的本田旗艦級MPV車，配備豪華至極又見一應俱全，難得重有唔錯的操控演繹。
車價：$390,000

豐田Alphard3.0V6
點睇：近年熱賣的豪華MPV車，配套設備多元化，能迎合不同用家口味之餘，性能跟操控同樣出色。
車價：$449,000