九倉工貿樓葵芳都會坊開新示範單位，以「FashionDesignerWorkshop」做主題，噚日開放，請埋「模擬屋主」現身，扮演時裝設計師，喺現場畫吓圖。為配合氣氛，又請兩位模特兒行Catwalk，即席演繹大師作品。
九倉助理董事黃光耀話，整呢個示範單位好經濟，七四七呎，只係二十五萬。除開放示範單位外，會加多個首年免息供按揭計劃，成交期可以由以往三十至四十五天，延長到三個月。都會坊只餘二十至二十五樓，同埋十八及十九樓各半層可以出售，每呎售千二。都會坊賣出逾十六萬呎，套現億七，即日加推二十樓單位，平均呎價一一八八。
重有兩個月就入伙嘅西環綠意居，近排再錄得一宗貨尾成交。
買家三月買咗一個中層單位，今次再度捧場，以三百九十九萬，購入高層D室，七百五十二方呎，呎價五三○六元。
聽講，呢位捧場客，係證券行高層，周不時見報嘅京華山一研究部總監鄧以旭。
佢連入兩個單位，估計一個自住，一個投資收租。
深圳樓市近一年本銷及外銷反應理想，其中百仕達花園東郡，吸引逾千人次參觀，收五百多票，上周喺當地開賣，即日沽出三百餘伙。
發展商見銷情好，所以趁勢來港推售，首批五十伙，現已超額兩倍，發展商考慮加推第二批單位。樓盤重接獲多宗大手洽購，有意購入數十伙作投資用途。該盤計劃下周公開發售。
今次在港推售，主要為第八棟，單位四九○至一二七四呎，屬一房至三房設計。
業內人士話，呢個盤租務活躍，租金回報率可達八至十厘。
工廈唔係熱賣物業，但只要睇準機會，其實一樣可以賺到笑，幅度不比豪宅或寫字樓遜色。
中原工商部營業經理蔡榮祥話，柴灣明報工業中心中層約萬四呎單位，去年五月以四百五萬成交，近日以九百二萬轉手，一年多勁賺四百七萬，升一點零四倍。呢個投資者認真夠眼光。
蔡榮祥指出，業主為廠家，看好工廈前景，進可攻退可守，趁去年沙士期間入市，用嚟做倉，見有得賺就沽貨套利。
據講，買家從事家具生產，業務主要喺內地，香港得個寫字樓單位，今次購入工廈單位做貨倉。
蔡榮祥話，工廈回報率高，一般新樓有十厘，舊啲就達十三至十六厘。
蘭西有日經過灣仔柯布連道行人天橋，旁邊住宅大廈，突然多咗排燈箱廣告，遮住面向天橋窗口位。
條行人天橋人流極高，個廣告位肯定好值租，但住戶從此要過暗無天日生活，唔知有何感想？
本港樓宇密集，樓望樓情況好普遍，有啲單位望行人或行車天橋，情況重慘，屋裏面做乜，都畀人睇得一清二楚，完全冇私隱可言，有啲住戶可能唔介意，但有啲就選擇長期落窗簾，費事煩。
蘭西
電郵地址：
