港股繼續牛皮，全日收12082，跌78點，成交達117.77億元。午後遠東生物制藥（399）成為焦點，原因是隻股被人斬倉，股價一度大跌近95%，低見4.8仙，比起中期盈利每股5.9仙重要低，若以03年度分派股息2仙計，股息率高達42%，吸引唔少散戶趁低吸納，結果將股價推回6.8仙，正當阿虎心思思之際，股份已被勒令停牌。
不過，即使能在低位掃到貨都咪開心住，因為此股傳聞滿天飛，包括大股東在國內出事，以及大股東被斬倉。公司曾借入8000萬美元貸款，據聞協議要求主席蔡崇真必須持有35%股權，若斬倉消息屬實，會構成貸款違約事件，公司可能被即時追數。
創科（669）噚日亦停牌，市傳公司好事近，發行換股債集資11.3億元。唔使問阿虎都知集資是用於收購，創科早前透露會入股歐洲一間電動工具生產商75%股權，阿虎收到料創科的對象是Metab。創科去年手頭現金達26億元，加埋呢11.3億元，手頭資金接近40億元，足夠收購之用。
中海集運（2866）好似低處未算低，噚日再挫8%至2.575元。唔通中集真係俾花旗講中，股價要見2.20元？如果係咁，認購咗平安保險（2318）嘅散戶相信會坐唔安。市傳平保公開發售超購50倍左右，配售部份雖獲超購，但芬佬多數落限價盤，即是以接近下限價認購為主。唔少證券行都認為招股價範圍定得太高，叫客戶唔好認購。上述三點與中集極為相似。
阿虎