阿飛、媽田和曾鈺成三個前黨魁，噚日一齊喺中大新亞書院「新亞與雅禮的首個五十年」研討會上做主講嘉賓。被阿飛窒係「唔同層次」嘅成成，又喺度呻民建聯過去點樣俾《風波裡的茶杯》節目迫害。飛哥話，其實商台嘅phonein係好公平，不過鬧政府和幫政府嘅phonein比例真係好懸殊，係20比1！
聽到成成咁講，媽田甚至窒佢話：「你叫北京叫佢哋收聲咪得囉！」
去到中段，阿飛因為要做錄影節目早走，得番媽田和成成繼續唱對台戲。台下唔少聽眾都係老番，自然較關心中國。成成話，其實𠵱家嘅共產黨，比毛澤東時代更受人民支持，如果要比較老毛同提出「一國兩制」嘅老鄧，佢竟然話當然係老毛好好多，因為老毛識寫詩，老鄧就唔識寫，咁都得！但係成成唔肯答，究竟胡錦濤好定係老毛好。
媽田就講中美關係。佢話外交其實都係涉及經濟利益，記得一次同法國領事講，「法國有自由、平等、博愛，不過在三者之上就係空中巴士！」個法國領事就回敬媽田話：「空中巴士除咗法國外，重有英國份！」
另外，前日激親媽田被指言論下流嘅陳啟宗，噚日出席「恒隆數學獎」成立典禮嘅時候，就只談教育，冇再講惹火嘢。
傳真︰2623-9278
電郵︰