好耐冇出現嘅笨豬跳事件又再出現，有唔少基金持有嘅遠東生物制藥（399），噚日晏晝突然食咗瀉藥，由0.90元直插落6.8仙收市，勁跌92.4%，成交股數高達6.18億股，金額6711.6萬元。
經紀陳話，唔使問阿貴，成件事一定係斬倉。江湖傳聞，貨源主要來自大陸同胞在香港多間證券行的戶口，由於佢哋持有街貨數量極多，所以影響力極大。最大件事係一班不知就裏的芬佬，無端白事亦跟住陪葬。據講金手指過往揸得好重，但去年年底已減持至5%樓下。至於被聯交所話聯絡唔到嘅大股東兼主席，佢所揸住嘅股票有冇受到牽連，就有待查證。
遠藥在3月份公布中期業績，盈利有成1.2億元，淨係銀行存款同現金都有6億元，一間睇嚟好實在嘅民營企業，股價竟可以單日直插9成，投資者對大陸民企的信心又再受一大打擊。
另外，近排積極回購股份嘅華人置業（127），據講又再活躍於搞投資者推介。不過上次大股東批股後股價急回，令唔少人輸過錢，加上市況又唔係太理想，小初都係決定玩少一鋪。
慕容小初