自由黨搬新總部，做咗新郎哥一樣咁滿面風采嘅黨主席田少，自然係滿場飛嘅核心人物。眨吓眼，離田少一手發動驚天地泣鬼神、獨力避免解放軍血洗中環嘅「七七事變」，又就快一周年。今年七一嚟緊，田少會唔會再次非凡出手，又試改寫歷史？田少笑笑口話：尊重民意，市民鍾意七一去遊行嘅話，咪遊行囉。
田少嘅自由黨，本來講到明係代表商界，可惜近年商界有好多敗類，公開謾罵港人，又挑撥分化，田少呢個工商黨，對呢班發財絕唔立品、開口就罵阿董「揦屎上身」、埋口就抹黑李柱銘同美國佬「開房」、把口愈來愈臭嘅億萬富豪，毫無約束力。若然田少冇法子強勢領導，吹雞喝令呢班惡少收聲，睇怕喺中方心目中，自由黨始終係一嚿豬頭骨。
呢嗱，合和首領胡應湘，承接羅康瑞嘅口水尾又呼籲港人如果唔肯順從基本法，係都要普選嘅，就離開香港咁話。呢一招重陰過叫港人上街，直頭係煽動香港人學越南船民一樣千帆並舉橫渡太平洋。
特區政府呢六年，將香港點金成鐵，搞到臭晒，再冇民主改革，港人任由中國政府繼續亂咁再欽點一啲又蠢又勤力嘅奴才傀儡做第三屆特首，唔使胡應湘吹雞，香港就一定會出船民。何況聽講二○○六年，中國一定會打台灣，而阿扁總統就話到明，一旦受侵犯，一定用導彈炮轟上海同香港。到時台灣導彈射到埋嚟，打唔打得中港島大佛口合和大廈就唔知，不過到時肯定會出現港九恐慌性大逃亡。胡應湘、羅康瑞把口一定會靈。
至於胡爵士開口埋口就大罵港人唔聽話，佢自己係咪好乖仔呢？佢想喺大道東一帶鏟平多幾座樓起多座摩天大酒店，俾環保團體抨擊為破壞景觀，政府有關部門據理將胡某嘅發財大計否決，可能就咁累胡爵士搵少咗十幾億，佢就一哭二鬧三反枱，大罵董建華政府冇法治！
真係好笑喎。順佢胡大少爺嘅意思，就叫做法治，阻住佢搵食發財，就叫做無法無天？咁唔通香港嘅終審庭，由炮台里搬咗去大佛口嘅旋轉餐廳？
講到愛國，胡應湘喺回歸後未得國家批准，私自接受英國政府頒授爵位（連陳太都唔敢接受），正如陳啟宗猛叫李柱銘交代同美國佬講過啲乜，胡爵士係咪亦應該向中國交代吓？係人都知，英國佬出名縮骨，對待一啲黃皮膚嘅亞洲土人，永遠冇免費狗餅派，人哋鬼佬爵士，你又爵士？當貝理雅笑笑口，彎低腰，將一個金牌用一條繩圈掛上歌頓．Wu肥肥嘅頸際，跟住烏個頭去佢耳邊啜一啖嗰陣，對佢發出過乜嘢吩咐，係咪指示佢適當時煽動港人大逃亡？田少身為自由黨主席，好應該傳召吓爵士，了解吓真相。不過講身家，胡爵士好似多過田少，唔怪得自由黨指唔郁商家佬喇。
傳真︰2623-9278
電郵︰