恒指守穩萬二點以上，跌78點，幅度唔算大，但氣氛繼續唔多好，成份股只有地鐵（066）、德昌（179）、裕元（551）3件有輕微進帳。就算繼續睇好呢3隻逆市而升嘅成份股，亦都冇相關嘅Call輪買得落手。
國企指數跌128點，幅度3.1%，有3隻中企指數Put上龍虎榜，升幅由11%至45%。9369輪價4.5仙，溢價3.9%，槓桿率33.2倍，溢價略嫌貴啲，而且下周四最後買賣，國指幾日內跌唔夠3.9%以上，揸隻輪就要輸錢。9411亦係下周四最後買賣，輪價17.4仙，溢價1.4%，槓桿率7.7倍，呢件較9369實際啲，但亦要留意時日無多。9655係主角，有75球易手，8月底到期，輪價21.6仙，溢價5.2%，槓桿率5.6倍。呢件槓桿率雖然輸蝕啲，但壽命與溢價着番數。
滙控（005）微跌50仙，Put輪9177收4.1仙，升幅17%，打入龍虎榜，有2.5球易手，隻輪下月中最後買賣，大約重有18個交易日玩，溢價7.3%，槓桿率283倍，好爆炸，不過要博正股跌多8.5元以上，唔多實際。揀滙控Put輪炒，9690數據靚啲，輪價79仙，溢價3.4%，槓桿率14.7倍，不過弊在難買賣，昨日唔夠16萬份易手。
利豐（494）收11.35元，跌10仙，Call輪9134收1.5仙，散35%，下月底夠鐘，行使價13元，正股上到行使價，機會好微，隻輪最後作廢機會好大。
章盛