徐克呢排認真忙碌，因為佢除咗要搞梁羽生原著嘅《七劍下天山》電視劇，重要籌備電影版，電視版會交畀霍耀良做導演，佢只負責監製，但電影版就由佢親自操刀。
聽講電視同電影兩個版本都預計八月喺新疆開拍，男主角係黎明同韓國紅星宋承憲，女主角就係楊采妮，佢早前遠赴新疆為《七》片試造型。而徐克日前已經去咗新疆睇景，聽講佢都好滿意啲景，認為好合劇情要求。
至於《七》嘅電視版，就會由趙文卓同蔡少芬等人演出，一共拍六十集，會分兩部份嚟拍，分別喺新疆同四川拍攝。馮仁昭打電話畀黎明經理人陳善之，佢話：「徐克係想搵黎明拍呢部戲，𠵱家雙方重喺度傾緊。」
溫碧霞前晚去睇成龍《80日環遊世界》首映，主角成龍同莫文蔚都未見出現，連原本答應現身嘅成龍愛子房祖名亦甩底，場面冷清。其間溫碧霞話希望今年可以成功造人，但講到底佢都係想拍番套有代表性嘅電影。前晚首映係為「心晴行動慈善基金」籌款，大姐明話近日收到唔少海外藝人嘅求助電話，但邊個佢就唔肯透露。
陳鍵鋒同薛凱琪主演嘅《學警雄心》最近惹嚟唔少是非，除咗話佢哋不和之外，重有報道稱陳鍵鋒唔滿意監製黃偉聲指佢小器。黃偉聲噚日同馮仁昭呻話：「其實係陳鍵鋒經理人Ivy問我點解搵薛凱琪做，可能我講得唔係太清楚而引起誤會。部劇重有排拍，我唔想佢哋大家面左左，所以遲吓我會搵佢哋兩個一齊傾傾。」
麥嘉個二十六歲嘅仔麥雲龍，上月涉嫌酒後駕駛被捕，前日缺席應訊俾法庭發通緝令。麥雲龍噚日終現身九龍城法院，麥雲龍承認一項酒後駕駛罪，被判罰款五千元同吊銷牌照九個月。佢話：「冇出庭係因同法院嘅秘書溝通出現問題，誤會上庭期。」裁判官接納佢解釋。案件編號：KCCC8140/04
陳少寶之前單涉嫌貪污案已經告一段落，𠵱家專心搞佢間「大上海一品香」上海菜館，今晚六點會正式開張做生意。噚日見佢間舖重有好多裝修工人只係執緊啲手尾，基本上都搞妥晒，入面地方都幾大，重有獨立房，梗係方便圈中人幫襯時可以有私隱啦！
無綫近日將八十年代嘅《十大勁歌金曲》製作成VCD出售而引嚟多間唱片公司不滿，無綫高層曾醒明噚日話已經同IFPI傾緊，佢話：「無綫係非常重視版權，而且係一間負責任嘅公司，點會唔依法辦事呀？我哋冇侵犯版權。」𠵱家啲唱片銷情慘淡，呢隻VCD又賣得，唱片公司梗詐型！
