官恩娜（Ella）近日擔任許冠傑（Sam）的演唱會嘉賓，知名度迅即提高。她坦言初踏紅館台板的感覺是心震震、腳軟軟，與阿Sam拖手更是難忘，她笑言：「真係爽呀！」
官恩娜一連演出了十場許冠傑個唱，回想起第一晚初踏台板，Ella不禁笑說：「我第一次做咁大型嘅演出，真係會緊張，知道台下有咁多人望住，我猛咁話畀自己聽唔好咁緊張，但我個心係震晒、腳又軟晒，後尾至愈做愈放。」
Ella由綵排至演唱會結束，前後跟阿Sam相處了兩個多月，她對阿Sam簡直有讚無彈，還大爆阿Sam愛戲稱她為「娜兒」，Ella說：「佢嗌鄭融做融兒，胡杏兒就係杏兒，廖碧兒係碧兒，我就叫娜兒。阿Sam好風趣，佢講啲嘢好有意思，對呢個社會都會開心啲，我見到佢咁開心，自己都會好開心，佢講嘢嘅口脗好親切，佢啲屋企人都一樣咁nice。」
Ella又透露每次綵排和演出後，阿Sam總會禮貌地親親她的臉頰，她笑說：「我有一場同佢合唱《無敵是愛》，拖住佢隻手好正，真係爽呀！」
Ella表示今次與阿Sam合作獲益良多，對方還送她一個背囊作禮物，她說：「佢送咗一個斑馬紋嘅背囊畀我，我收到好開心呀，佢對人真係好好，我重記得有次綵排，我唱完之後就到阿Sam綵排，當時佢要唱《最佳拍檔》，但我隻手重揸住支咪喎，佢嘅眼神好友善，後來我哋就一齊合唱啦，我到𠵱家都好記得呢一幕。」
此外，官恩娜昨日原本要到新城接受訪問，但她有病在身未能出席，不過她接受電話訪問說：「我之前做許冠傑演唱會做到好夜，頭先做gym又跑到好攰，搞到暈暈哋，所以走咗去睇醫生。」
採訪：朱倬誼 攝影：何國豪
服裝：Easy
髮型：Warden（IIColop）
化妝：Cyrus（BeautyTech）
形象：WilliamChan
