高官個個都話香港經濟好番，愛國報紙大讚自由行遊客救活香港，中央行德政。
呢日到海鮮集團酒樓，董事K哥話：「自由行效果唔多覺噃，反而本地人消費力降低晒，上到嚟好少點高價菜式，我哋希望做到唔拖欠員工薪金咋。」既然如此，K哥自己執生，呼籲啲夥計執生，適應形勢，人人走多一步，服務第一。
再問時裝入口批發小老闆V小姐，V小姐嚡嚡聲話：「自由行遊客搶貴晒啲舖租就真。幫我攞貨嘅屋邨、橫街boutique，落單重少過舊年沙士，啲客仔零售生意全無起色。」V小姐自己久唔久就去莎莎買化妝品，知道莎莎、卓悅已成為內地同胞世界，人逼人，總之同胞嘅錢多數用喺LV、金至尊、周大福、莎莎、豐澤、百老滙等等店舖，其他人得個望字。
公關阿美就笑到四萬咁口，因為佢間酒店嘅入住率經常站穩在九十巴仙以上，唔驚冇客。生意一好，職員就郁動，兩個職員立即俾人撬走咗，惟有請番一啲新人——今年嘅大學畢業生。阿美話：「好奇噃，好多報紙話本地大學生中英文水準低，但我哋幾年冇請新人，今年見番一啲，唔曳吖，有兩個中大新聞系嘅女仔，直情非常標青㖭。」電腦J聽見，立即附和：「批評本地大學生，有啲言過其實，我公司有一個寫手K，畢業於理工大學，寫得唔知幾好，作家C叫佢做人肉字典機，每逢執筆忘字，就打電話搵K小姐！」有此好料，左丁山都費事查字典咯，以後問寫手K可也。