有俄版Boy'Z之稱嘅組合SMASH!!，喺當地有幾受歡迎，相信睇完佢哋首歌《Freeway》嘅MV就一定會知，而呢兩個𡃁仔亦都好識做，喺MV入面狂除衫晒肌肉，估唔到佢同師姐t.E.m.A.（前名t.A.T.u.）一樣，喺台上大玩同志式舞步，務求令fans尖叫！
由金毛仔Vlad同黑頭髮嘅Sergey組成嘅SMASH!!，佢哋隻處男大碟首主打歌曲《Freeway》嘅MV入面，擺明強調自己係俄國萬人迷，佢哋出現嘅地方，都有一大班年輕俄國女子追隨，班女fans重瘋狂到好似荷李活片《活死人凶間》入面班喪屍，夠晒嚇人。
當SMASH!!兩位靚仔喺台上表演嗰陣，佢哋即時施展渾身解數，唔只好合拍咁又唱又跳，亦不時大晒肌肉。我大口羅拉估唔到Vlad同Sergey兩個，原來唔似日本嗰啲排骨仔偶像咁單薄，佢哋喺台上盡情晒胸肌、腹肌同背肌，都算幾有睇頭。
不過，我羅拉睇見SMASH!!身穿窄身露臍魚網衫，再加上佢哋有啲似當年t.E.m.A.嘅同志式又搓又磨嘅親熱舞步，真係覺得有啲反胃，不過，相信唔少姊妹都會覺得呢啲先係正嘢！