【本報訊】「諗住大家都係揸『三菱』車，見佢好似飲醉酒亂切線，咪好心提吓佢揸慢啲囉，點知佢咁惡重出手㖭！」兩名好心男子昨清晨駕車行經旺角亞皆老街，停燈位時善意提醒隔鄰私家車司機小心駕駛，結果對方不領情發惡打傷其中一人，惡司機驗出酒後駕駛「超標」近三倍兼傷人被捕。 記者：盧志光
兩名「好心冇好報」男子分別姓舒（三十二歲）及姓周（三十五歲），昨清晨五時許，兩人在九龍城一間酒吧睇波飲酒後，由舒駕駛一輛三菱私家車，載同周沿亞皆老街駛往旺角。
「我哋兩個人都飲咗啲酒，所以我沿慢線揸得好慢，駛到九龍醫院對開時，見另一架『三菱』私家車係路中左穿右插亂切線，司機好似飲醉酒揸車咁，好危險！」舒事後講述事件經過時一臉無奈。
舒續稱，當他駕車駛至亞皆老街與洗衣街交界燈位停下，剛巧碰回早前遇上疑胡亂切線的三菱私家車。他一片好心對該車司機說：「大家都係揸『三菱』，你係咪飲咗酒呀？揸慢啲囉！」現場消息稱，對方私家車上男司機聞言大為不滿，怒氣沖沖落車走向舒破口大罵：「關你乜X事呀！」坐在舒旁邊的周即時落車勸止：「你唔好咁啦！」卻被人揮拳襲擊，左眼角擦損輕傷，舒報警求助。
警員趕至初時以為傷人事件涉及交通事故，召交通警員到場協助，替三人進行酒精測試，證實舒及周均有飲酒但未有「超標」，疑出手打人姓黃（二十六歲）司機否認胡亂切線，驗出超標近三倍，涉嫌酒後駕駛及傷人被拘捕。