自3月CeBIT上，三星展出「伸縮」機海之後，已經話畀天下人知，伸縮式機身就係今年大熱Item。3個月之後嘅新加坡CommunicAsia2004，呢個形勢似乎更加肯定，皆因就連日本大廠Panasonic亦展出旗下首部伸縮機X500，加上其他「X」家族新成員，自然人頭湧湧。而三星與LG等韓系廠商亦都毫不遜色，同樣有新機撐場！
記者、攝影：劉耀祥
每年於新加坡舉行的CommunicAsia，為亞洲區內每年的電訊界盛事，可惜今年規模比往年略為遜色，只有5個展館，不過亦吸引近1,500個參展商。而要數手機大廠攤位，今年就只有Panasonic、三星、LG、SonyEricsson及Siemens。
（推出日期：今年第三季）
X400雖然係摺機，不過一樣向厚度挑戰，摺埋後機身只有17.5mm厚，比起好多直身機重要薄，而規格則與X200相若。同場亦有部A500，外形與X400相似，但係就唔玩影相玩換殼，一樣頗具吸引力。
（推出日期：今年第四季）
多個攤位中，當中以Panasonic最多新機，個展區夠大之外，吸引力亦為全場之冠，尤其以旗下首部伸縮機X500吸引力最為厲害，外形驟眼睇與SonyEricsson嘅S600有幾分相似，不過就唔係採用旋轉機身，6萬5色彩芒配上30萬像素鏡頭，影相兼拍片，之但係機背重精采，一身數碼相機裝扮，拎住影相真係隨時分唔到係手機定相機。會場上只展出銀色機身，不過其宣傳單張上已經有紅色機身，與銀色相比又另有一番風味。
（推出日期：今年第四季）
除X500之外，Panasonic亦有展出另外4部新機，當中X200及X400就大玩超薄身，一樣唔少人圍住駐足觀看，玩完再玩亦大不乏人！
X200有啲似SonyEricsson的Z200直身版，主要大家都採用環形天線，不過機身就十分纖薄，只有12.9mm，加上30萬像素鏡頭、6萬5色彩芒及16和弦，已經夠晒吸引力。
（推出日期：今年第三季）
睇型號X100似乎係最細，之但係筆者就最為喜愛，機身四四方方夠得意，加上內置影相鏡頭，外形相當有新鮮感。最令人驚喜就係6萬5色彩芒效果，顏色夠實夠Sharp，起初重以為係模型機，期待度爆晒燈！
X610輕薄玩扭擰
（推出日期：今年第四季）
那邊廂Panasonic新機空群而出，這邊廂三星亦唔執輸，展出新機X610，乃三星再向直身機市場進攻之作。一致認為係X608後繼之作的X610，最顯眼當然係飛甩天線，不過其最大賣點就係玩超薄機身，厚度只有11.8mm，比起同玩薄身嘅PanasonicX200，即場就贏咗個馬鼻。X610功能方面則有30萬像素鏡頭、6萬5色彩芒及64和弦等，支援拍片、Java及MMS，相信唔使好耐就有得玩。
（推出日期：今年第四季）
除X610之外，三星當然唔少得其老本「摺機」，會場上就展出新機E610，外形同一般三星機截然不同，有條天線之餘，機身亦變得較為「肥仔」，較特別之處就係機內採用全黑色，的確幾少見。規格則為26萬色彩芒、30萬像素鏡頭、拍片、Java及64和弦等。
F7100新機滑出場
（推出日期：今年第四季）
LG攤位於會場上亦甚具規模，除其看家本領CDMA制式手機之外，亦展出不少現時售賣中之型號，不過當中亦都有GSM新機，新作F7100就用上推蓋式機面，與之前的7050同一FormFactor，顏色亦用上較特別的黑色，又具有另一種風格。雖然外形較特別，不過F7100可能走入門級路線，所以並冇內置鏡頭，其他功能就未有詳細透露。
