賣地成績雖在預期之內，個價總算理想，多少可以刺激買家入市信心。好似尖沙嘴擎天半島，一名資深投資者覺得，樓市氣氛在賣地之後轉好，即時扑槌，買入一座高層，作價一千萬，逾千四呎，呎價近七千。
買家自住港島區，不過鍾情投資九龍新樓，買嚟長線收租，今次都唔例外，以市值月租三萬三計，有四厘回報，相當唔錯。
中原孫耀祖話，買家唔少收租物業，單係擎天，已有三個，包括年初用九百萬買入嘅兩個，𠵱家收緊租，回報五厘七同五厘。短短半年間，喺擎天投資咗千九萬，都算捧場。
雖然話近排成交少咗，但投資者幾時都吼實個市，出擊入貨。
好似越秀投資薄扶林富臨軒，利嘉閣話，有個投資客，想用六千八萬，掃入尚餘十四伙，呎價五千六。
西半山區負責人楊建文話，呢位投資客買開港島物業，認為呢個盤有水位。
富臨軒有百二伙，尚餘十四個之中，有兩個頂樓相連戶。附近鴨脷洲深灣軒，第三座呎價成七千蚊，富臨軒同區貝沙灣，呎價八九千，唔怪得投資者睇起上嚟，覺得富臨軒應該有水位。
代理就話，呢個盤租務需求唔細，回報應有五厘。
周二賣地，大家好關注，唔少買賣都等賣完地至落實。香港置業鍾坤文話，大角嘴凱帆軒三座低層G，五九三呎，業主喺賣完地後十分鐘，即以近二百三萬摸出單位，每呎近三千九。佢上個月以二百零八萬買入，不足一個月執二十一萬，賺一成。
買家為同區換樓客，兩三個月前四出睇樓，但一直對樓市抱觀望態度，見賣地成績唔錯，預期樓價短期再升，所以加快扑槌。
新地屬下啟勝管理，九七年開拓內地業務。
最新負責嘅內地項目，為東莞愉景東方威尼斯廣場，第一期商場九十三萬呎。
啟勝董事總經理黃振華話，引入大租戶，有深圳天虹商場及順電家居廣場，承租樓面三十三萬呎。
商場租出一半，另有三成在洽商中，每呎叫租八十至二百元人民幣。第一期商場預期年底落成。
中港交流融合為大勢所趨，兩地機構人員互訪增多。
廣州市房地產中介服務管理所，及廣州市物價局代表，日前來港，到美聯物業總部拜訪，會面交流意見，探討兩地代理行業分別，以及香港管理模式對廣州房地產業發展嘅推動作用。美聯主席黃建業等一班高層出席。
另外，廣州市機構編制委員會、廣州市國土資源局和房屋管理局代表團一行十五人來港考察，到中原地產總部參觀。代表團對中記日常運作、資訊管理同中原網頁等都好感興趣。
蘭西
電郵地址：
