單睇收市恒指升111點，個市都算唔錯，但睇埋同全日最高比較，個市氣氛實在麻麻，恒指最高升過210點。開市買貨嘅，中段已經坐艇。開市早段高追藍籌Call輪嘅，可能已經輸緊15%。
最大3隻藍籌滙控（005）、中移動（941）同和黃（013），升幅由0.9%至1.6%，總共拉高恒指69點，即係其他30隻成份股夾埋只係令恒指升42點。個市升，有幾多人得益可想而知。個市唔適宜睇得太好，每次彈上去，都有沽盤湧出，窒住升勢，好易打回原形；亦唔適宜睇得太淡，始終恒指由萬四點以上碌落嚟，調整幅度已經唔細。
暫時喺窩輪市場搵食，唔容易，只宜短線買賣，甚至做即市，連過夜都費事。
若然恒指再升多啲，博個市回頭，揀Put輪埋手，對象有9809同9777。9809喺9月到期，輪價19.2仙，溢價6%，槓桿率15.8倍；9777亦係9月到期，輪價22.6仙，溢價4.4%，槓桿率12.5倍，呢件數據靚過9809，但交投則輸蝕好多。
若然恒指回落，例如回到萬二邊緣，則揀Call輪埋手，對象有9799同9773。9799喺9月到期，輪價13.1仙，溢價3.7%，槓桿率15倍；9773同期夠鐘，輪價亦係13.1仙，溢價4.6%，槓桿率16.9倍。兩隻恒指Call輪都係交投活躍，上車容易，跳車亦容易。
章盛