睇歐洲盃，如果飲咗深圳假「青島啤」，食花生食到毒紅泥花生，問你死未！好彩呢啲「偽劣毒」內地食品只在內地出現，未曾喺香港流行，不過大家返深圳、內地威威之時，唔小心唔得。
內地奸商為咗幾個錢，手段無所不用其極，中央最緊要緊握政治權、軍權，民間經濟亂嚟一通，好似冇計仔，連《文匯報》都發社論要求中央正視，推出「食物安全法」，可知內地嘅「偽劣毒」食物，為禍非常嚴重。
要錢唔理人命，係內地奸商、官僚與見錢開眼、只求有工做嘅工人嘅惡劣作風，馬克思主義否決上帝，內地又批判孔子三十幾年，於是中國人既無宗教教育，又冇傳統儒家道德教育，加上走資之後，樸素之風盡失，內地道德觀念思想陷入真空，於是搶錢就是硬道理，消費者權益管他娘。
正是禮失求諸野，南韓一位餃子製造商申永文（譯音）被「食品醫藥品安全廳」揭發以自中國輸入嘅爛蘿蔔生產冷藏餃子，被人痛罵，債主臨門，於是跳落漢城漢江自盡，留下遺書話：「向國民致歉。」被揭發嘅申永文一個，但呢位三十五歲商人以死向南韓國民謝罪，仍有愧悔恥辱之心。中國內地嘅「偽劣毒」食品製造商，如仍有良心嘅話，應該向申永文學習，跳落珠江、長江、黃河！香港如果有奸商故意向內地買入「偽劣毒」食物嘅，大家一齊杯葛佢，等佢執笠，追數佬臨門！