中移動董事長應付長毛有計 - 李八方

  中移動董事長應付長毛有計 - 李八方

「股壇長毛」DavidWebb噚日又出動鋤奸,今次目標係藍籌股中國移動。大衞喺中國移動股東大會發炮,竟然同環保有關。
大衞質問流動電話電池含有毒素,若處理不善,會對環境構成影響。董事長王曉初見來者不善,即時敦起個錢其琛款,話佢哋一向對環保「非常重視」,如果用戶將舊電池交回,中移動會提供免費通話時間作為獎賞,回收嘅舊電池就會交環保部門處理。王董重話,中移動會與社會環保「同步成長」。
大衞今次又質疑點解獨立非執行董事鄭慕智冇出席股東大會,又問鄭某究竟過去一年出席過幾多次董事局會議,王董話鄭有要事在身,已經向公司請假,過去一年嘅會議鄭慕智全部均有參加。
會後,另一位獨立董事羅嘉瑞大力擦王總,話自己出席過眾多上市公司股東會,王總係答得「最好」及最有力嘅一位。有隻擦鞋箱擋住,長毛都攻唔入呀。
(圖)羅嘉瑞(右二)大讚王曉初(右)喺股東會上對答如流,連長毛(左)都唔怕。


傳真︰2623-9278
電郵︰[email protected]