早前碧咸（DavidBeckham）嘅一段情慾短訊搞到滿城風雨，估唔到香港演藝界都發生類似事件。李彩樺（Rain）噚日接受商台訪問時，自爆曾經被一個圈中後生男藝人用情慾短訊追求，對方更露骨話想同阿Rain做愛，搞到阿Rain好鬼驚。
阿Rain形容嗰位男藝人都OK靚仔，眼睛唔大唔細，家底就唔係咁清楚，不過近排好少見，以前亦冇一齊出過街。馮仁昭翻查資料，發現嫌疑最大嘅係○○年時傳過以電話攻勢狂追阿Rain嘅陳冠希，以及同阿Rain合作過網劇《百分百感覺》嘅蕭正楠。
不過阿Rain對於男藝人嘅身份就三緘其口，佢覺得用啲咁嘅手段追女仔好變態，佢話：「我冇諗過圈內人都咁激烈，當時我考慮過佢係唔係想一夜情，所以我冇覆過佢。」阿Rain又話唔介意同對方再合作，不過如果要拍親熱戲，就會盡量小心喎！
美國搖滾組合LinkinPark今晚喺灣仔會展舉行佢哋首次香港演唱會。LinkinPark六位成員噚晚已經由馬尼拉飛咗嚟香港，佢哋今日重會喺開騷前接見一百位香港歌迷會嘅成員。而LinkinPark完成香港表演後，就會飛去泰國開騷。
由外國記者協會舉辦嘅第九屆「人權新聞獎」日前頒獎，有線新聞台節目《時事寬頻》嘅「國安思危」系列之「在紅旗下」，同埋「何日見青天」兩個節目都攞咗電視組大獎。兩位記者蘇永權同唐朝雯嗰日接受湯家驊大律師頒發大獎獎項。而同節目嘅「疫症蔓延前」之「廣東篇」同「香港篇」就得到電視組優異獎，認真威水。
劉愷威噚日喺將軍澳電視廣播城拍攝無綫新劇《家有一寶》，佢話遲啲會同楊思琦拍激吻戲，劉愷威話：「我就唔係好想囉，我驚佢男友李永豪呷醋，佢都幾打得㗎，我都係第一次拍激吻戲。」問劉愷威怕唔怕女友廖碧兒呷醋？佢就咿咿哦哦，睇嚟廖碧兒應該重會好打過李永豪㖭！
張震嶽同杜德偉等所屬嘅台灣滾石唱片，近日因為同台灣錢櫃卡拉OK嘅合約出現問題，有傳因為咁發生財務危機。滾石噚日發表聲明，話公司冇接獲任何銀行要佢哋喺七月一日前嘅還款通知。又話本來滾石同錢櫃簽KTV伴唱帶授權合約，收咗對方嘅支票，後來錢櫃要解約，滾石話會喺一星期內同銀行辦妥手續，退番張票畀人。滾石重列咗一連串歌手嘅出碟計劃，證明公司冇問題喎。
