𠵱家人人都講環保，滙豐咁大間銀行，當然都要跟潮流。八方噚日聽該行工商業務環球聯席主管梁高美懿講，中環滙豐總行大廈，原來固定每晚七點熄燈熄冷氣，節省資源兼環保。
咁樣，如果同事要開工，唔可以七點鐘準時走又點算呢？梁太話，如果同事明知自己每日都遲走，就會預先通知有關部門，約定一個時間先熄燈，好似佢嗰房，就講明開燈開到八點鐘。若要臨時OT又點算呢？撥個指定電話，然後輸入密碼，就可以延長熄燈時間半粒鐘，若要再延長，則半個鐘後又要再打個電話去。八方聽滙豐嘅朋友話，其實個電話好多人打，成日都會jam線。
另外滙豐噚日正式推出「營商新動力」資訊網站，教中小企又慳又環保，梁太提供嘅小貼士就係，除節約能源，減少用紙、用環保紙、雙面打印等；滙豐本身已經用咗環保紙好耐，梁太話質地都幾好㗎。
傳真︰2623-9278
電郵︰