當奴呢輪當旺，不但做過清潔組長，到處污水養蚊，燒唔到佢嗰叠，重做埋珠三角首席紅人，招呼完深圳市長李鴻忠，父親節會去韶關，端午就喺清遠過節，噚日就應總商會嘅邀請去演講。佢老哥都算狼，既食免費午餐，又向商界提出兩大要求，第一希望商界「為己為人」，投資多啲落員工培訓，第二個要求就係請商界正視香港政制最終全面普選嘅安排，即係話功能組別遲早玩完，應該做好準備，多啲參政。
當奴苦口婆心，皆因佢感到香港目前嘅政治氣候好緊張，都想商界領袖幫吓口。不過，現時工商界嘅質素，例如陳啟宗，開口埋口，唔係大罵老董揦屎上身，就係謾罵媽田去美國有如同條女去開房，當奴嘅期望，睇怕會落空。
當奴最後重引述十三世紀一位人權分子St.Francis嘅說話作結，希望可以減低社會嘅戾氣，「讓我當和平的使者，以愛解恨；以恕解痛；以信釋疑；以希望喚起失望；以光明亮起黑暗，以歡樂代替悲傷，多些去關懷、諒解和愛護他人。」
當奴費盡唇舌勸交，可惜胡應湘爵士又繼續倒米，話叫還政於民即係搞港獨，又叫唔鍾意嘅人可以離開香港。民主黨副主席何俊仁反駁話，胡應湘嘅批評只係拾人牙慧，人民喺制度上扮演角色係順理成章，高度自治就係確保市民有基本政治權利。何俊仁認為，呢啲言論只會令更多市民因此參加7.1遊行。
傳真︰2623-9278
電郵︰