強行「釋法」，打壓港人民主訴求，又派蕭公公、許崇德落香港炮轟港人，安民謾罵李柱銘父子兩代，兼指使曾憲梓、鄔維庸等多次侮辱香港人「食狗餅」，收窄高度自治，中國終於玩出火，美國國會經濟及安全檢討委員會發表報告書，責令美國政府，要全面檢討美中關係大方向，包括所謂一個中國政策。
報告書重點抨擊嘅美中關係嗰一部份，屬國防外交唔關香港人事，令到香港人大感興趣嘅反而係，報告書指出既然中方破壞一國兩制，以細布殊為首嘅美國政府就應該檢討吓喺國會一早通過嘅香港政策法，包括係咪要取消香港喺航空、貿易等多方面享受緊嘅獨立權益。
國會咁嘅要求，無疑係十分正確。中方及土共日日向港人訓斥：香港係中國嘅一部份，香港人首先要學習做中國人，又日夜唸咒，喝斥勿搞「港獨」，話「一國大於兩制」，中方及土共長期嘅唸喃嘸聲音，美國當然收到，於是協助香港融入祖國母體，取消香港嘅亞太經合論壇獨立會籍、香港人移民美國嘅獨立配額、同埋國際航空協定、多纖維貿易協定、乃至世衞組織嘅獨立會籍，對於協助防止港獨，有正面嘅意義，大家應該表態支持！
政務司司長當奴，聽見美國國會發出合乎理性邏輯嘅指引性原則，唔知係咪有少少怯，竟然話唔希望「港美貿易關係」受到影響。
當奴咁講，就似乎有少少冇大冇細嘞。首先人哋美國係全球超霸，同香港並稱，按實力順序，幾時輪到香港行頭，應該叫「美港貿易關係」先至正確。第二，上文先至講過：香港唔係一個獨立嘅國家，係祖國嘅一部份，因此亦唔存在甚麼「美港貿易關係」呢樣狗屁不通嘅嘢，只有「喺美中貿易關係框架之下嘅美國對中華人民共和國香港特別行政區地方商務往來」，咁先至符合「一國大於兩制」、「不容香港另搞獨立或半獨立政治實體」嘅原則。
國會制訂咗香港政策法咁耐，亦係時候釋吓法嘞。美國協助推動中港一體化，防止香港由祖國母體分裂出去，係有好大嘅責任，今次國會發表報告書，係正確嘅一步。美國下次若果連荷李活片，都將香港當埋中國配額嘅一部份，只准出口唔超過二十部，咁啲UA院線就有大把檔期剩，第日可以日日翻映四級片同埋國家級嘅教育性大片《鄧小平》呀咁吖。
美國佬既然今次生性番一次，不再插手鼓動分裂，咁港人係咪應該七一嗰日出嚟行吓街慶祝吓咁呢？
傳真︰2623-9278
電郵︰