嚟緊嘅星期日就係一年一度嘅父親節，最近英國有間糖果生產公司搞咗個「最理想爸爸」選舉，點知被選出嚟嘅最佳爹哋，十居其六係虛構角色，就連主辦單位都跌晒眼鏡。
今次被網民選做最理想爸爸嘅竟然係經常行俠仗義同儆惡懲奸嘅蜘蛛俠，睇嚟好多人都想自己個爹哋係大英雄。第二位嘅就係卡通片《阿森一族》裏面嘅爸爸荷馬森遜（HomerSimpson），其實荷馬份人搞笑之餘又夠神經質，唔怪得咁受歡迎。
至於早排被性醜聞纏身嘅球星碧咸（DavidBeckham），今次雖然輸咗畀蜘蛛俠同荷馬排第三位，但喺真人嚟計，都算係No.1，睇嚟佢嘅好老竇形象都幾深入民心。
另外，排第四同第五位嘅代表，分別係童畫故事《哈利波特》入面榮恩嘅爸爸衞斯理先生，同《魔戒》電影系列裏面嘅亞拉岡。
除咗碧咸之外，其他入榜嘅真人重有第七位嘅英國諧星PeterKay、第九位嘅BryanMcFadden同埋第十位嘅占基利（JimCarrey）。發言人得悉結果後話：「我哋起初重估碧咸會贏梗㖭！」