大市噚日話就話升過百點，兩隻掛牌新股表現各異，抽中騰訊（700）有錢賺，但中海集運（2866）就一如所料潛水。港股回升，但投資氣氛就麻麻。多個經紀朋友話，有幾隻新股如平安保險（2318）般有抽飛現象。此外，唔少二三線股表現重弱過藥煲。
過往曾受芬佬寵愛嘅建發國際（223），宣布延期公布業績後，股價即跌12.3%，收1.14元，成交金額196萬元。
經紀黃話，佢都唔只一次提及建發激親芬佬，好似過往發大量新股買網站、原先停牌想供股，結果搞唔成變為批輪，都令到唔少芬佬激心。今次建發延布業績，據講因為需更多時間，提供多啲關於電子商貿平台嘅資料。傳統智慧教落，延報業績通常會影響投資者信心，所以在建發正式公布業績前，股價都唔慌好睇。
另外，好一段時間都係1仙淨沽冇買盤嘅瑞力控股（491），近排突然活躍番，噚日升9%，收1.2仙。經紀陳話，江湖傳聞呢隻仙股，或會股權易手。
慕容小初