港股噚日升111點，收報12161，成交金額143.74億元。
市場氣氛算是不俗，但對於首日掛牌的中海集運（2866）未見太大支持作用。中集表現差早在市場預期之內，不過阿虎冇諗過會咁肉酸。
市前交易時段，有手痕友將中集股價Mark低4毫半咁誇張，收市仍較招股價低12%，收2.80元。阿虎見保薦人百記早段在3.175元水平接唔少貨，但最終都頂唔順，全日成交高達20億元，如果只得百記單拖應付，自然頂唔耐。
花旗重出報告唱淡中集，話會見2.20元，叫人沽貨計數，呢次真係多得花旗唔少。花旗今次唱淡原因，主要嫌中集招股定價貴，因為國際同業市帳率（市價?帳面值）僅1.25倍，但中集則高達1.45倍。
據聞芬佬一樣嫌平安保險（2318）招股定價貴，重傳出有抽飛情況，有意認購平保的股民要小心。
黑客笑言，9月立法會選舉前夕，不妨留意北方興業（736）、駿雷（070）同信用卡防盜（1051）會否有異動。呢系股份同老詹關係密切，難道老詹參選，呢批股仔會為老詹打氣助威？老詹雖曾一度失去自由，不過在金融界中都不乏支持者。
國內汽車銷售數據唔多理想，銀行又收緊汽車貸款，噚日汽車股傳出有法資洗倉，搞到駿威（203）大跌6.6%至2.85元，成交2.3億元；華晨（1114）挫4%至2.30元；長城汽車（2333）亦跌3.6%至7.95元。
阿虎