林心如、殷悅同韓國演員韓在石𠵱家合作拍緊電視劇《紫藤戀》，早排有消息傳出話林心如同韓在石不和，但日前佢兩個就俾傳媒發現約埋一齊喺台灣蒲夜店。
雖然林心如同韓在石佢哋每逢出席宣傳活動都交足功課，又攬又扮錫咁，而蒲夜店當晚林心如同韓在石都有一齊去玩，但佢哋不和嘅傳聞並冇因此停過，因為聽講林心如同韓在石嗰晚喺夜店，兩個幾乎冇講過嘢，而成班人凌晨時分走嗰陣，佢兩個等緊車時都唔傾偈，各自同朋友傾，似乎真係有啲嘢。
其實當晚重有《紫》片嘅其他演員，一行人去到夜店，喺入面玩得好瘋狂，其間發出好多笑聲，記者企喺出面都聽到。之後林心如同另外兩個女仔去完洗手間，幾個人喺廁所外面玩到癲晒咁走嚟走去，完全唔理自己嘅玉女形象，失晒儀態。
李司棋同顧紀筠前晚喺銅鑼灣出任盈康活代言人活動，司棋姐去年因為右腳骨枯萎而對人生感到灰心，但近日佢再睇醫生嗰陣，醫生竟然話佢有進展，司棋姐前晚重可以着番高踭鞋出席㖭。而顧紀筠近日開拍《學警雄心》，面對一班年輕新人，佢話：「新人嚟講薛凱琪好努力，但可能演技要多啲磨練。」
資深演員黃蕙芬日前喺伊利沙伯醫院病逝，享年九十二歲。黃蕙芬一生心繫戲劇同默劇，佢都曾經同汪明荃、張之珏合演無綫電視劇《清宮殘夢》，扮演嘅慈禧太后一角，當時都算深入民心，黃蕙芬曾獲獎無數，舊年重獲得香港電台同香港戲劇協會合辦嘅「第十二屆香港舞臺劇獎」頒發的「終身成就獎」。而黃蕙芬曾同名導演譚國始結過婚，一對仔女都係成功嘅專業人士，佢一生對戲劇界嘅貢獻，絕對值得後人敬佩，而佢嘅辭世，令人十分惋惜。
