中國人民銀行再吹風，話最快都要9月才加息，叫大家唔使太擔心，不過市場仍擔心美國會加息。港股觀望氣氛濃厚，恒指窄幅上落，收12050，跌25點，成交金額縮至109.8億元，地產股對賣地消息反應唔大。
沙浦道地皮以接近市場預期上限成交，作價10.1億元，呎價接近3000元，算是中規中矩。不過就確認上一次賣地成績並非偶然偏高，而是實際市價，有意置業者勿掉以輕心。
上次馬鞍山地皮及沙田地皮成交價高出勾地底價70－80%，今次沙浦道地皮成交價亦高出48%。勾地價是政府的底線，兩次賣地的成績都咁理想，其實反映政府開價未夠貼市，講白一點其實係賤賣土地。
在勾地制度下，有關差價尚可透過拍賣程序取回，不難想像政府過去在補地價事宜上，賤賣幾多寶貴資產，最大得益者，相信非農地大地主新地（016）及恒地（012）莫屬。
早前講過金衛醫療（8180）大拿拿斥資4.5億元，購入抗愛滋中藥專利權。現時花旗美邦都覺得此股風險因而大增，調低其目標價至3元，結果股價應聲急挫10.5%至3元，即時到價。
金衛市值約18億元，假若能向外界提出更多證據，顯示唐草片對愛滋有療效，市值隨時翻幾番都得，到時重邊有人敢話佢風險高，可惜至今仍未能說服投資界相信新藥的效用。
新濠（200）今個星期五請傳媒參觀摩卡角子機娛樂場（金碧）的開幕禮，唔知隻股會否有所表現贈吓興？新濠噚日收2.325元，冇起跌，成交只得39萬元。
阿虎