昨日賣地，冇上次咁熱鬧，成價去到10.1億元，比底價高出48%，係市場預期嘅上限水平，對樓市影響屬中性。
得主華懋集團，由於隔籬有幅地，因此志在必得。以成價計，每方呎樓面地價2961元，但由於可出售面積最少比建築面積多出20%，因此，每方呎的實際地價只係2468元，加上建築和財務成本約1000元，若能以平均呎價4200元出售，發展商已有20%利潤。當然，4200元只係最保守估計，華懋就計劃將相連地發展45層高的住宅樓宇，希望呎價去到6000元。
樓市已確認見底回升，但大行對地產股睇法分歧，一波唱淡，大摩就打對台，認為樓價急升後短期雖會反覆，但中長線就睇好。
大摩估計，05至07年住宅樓宇落成量，會由2.34萬伙回落到1.4萬伙，樓價在04年下半年整固完成後，未來一兩年可上升15%至20%。
大摩指目前地產股股價平均較資產淨值折讓26%，其中最睇好新鴻基地產（016）、嘉里建設（683）同信和置業（083），3股嘅目標價分別為94.7元、18.7元同6.6元。
噚日港股大部份時間喺窄幅內爭持，升過亦跌過，最低險守12000大關，收12050，跌25點，成交縮到唔夠110億元。期指前日大插後，噚日轉番強，收12099，高水49點。睇個勢，拋售壓力唔大，而大行在低位亦有大手吸納，估計整固多一兩日後，可以再上升途。
滙豐控股（005）近日曾升上119.5元，噚日收115.5元，又去番20日同50日線水平，短期走勢料反覆上落，但後市睇好。港股明年個上升大浪，恒指上望16000至18000，滙控肯定可創出新高。
揸滙控，純粹係以穩陣投資做出發點，大行估滙控嘅目標價，最樂觀嘅去到140元，以現價計，升幅20%，但加埋年息有近5%，以持有1年計，回報有25%，已算係幾理想嘅投資。
當然，若明年恒指真係上到18000，滙控股價有機會再上層樓。
郭兆誠