前日大市急跌逾300點，噚日投資氣氛即刻逆轉，好幾個經紀朋友都話，原先有唔少客話認購平安保險（2318），但突然間都話hold住先。
大市氣氛轉淡，令人擔心今日兩隻掛牌新股嘅表現，以下限定價的中海集運（2866），經紀黃重話聽到聲氣唔多好。
騰訊（700）備受追捧，但因為認購太踴躍，導致公司將公開招股部份，增加至與國際配售部份各佔一半，令街貨大增，想好似蒙牛乳業（2319）首日掛牌勁升，相信有一定難度。
經紀黃話，如果中海集運今日股價潛水，佢唔會覺得意外，但就希望唔好太肉酸，因為唔少新股輪住上市，中集的表現好影響其他新股的認購。
另外，冠捷科技（903）將於6月23日公布首季業績，支持佢嘅美資大行繼續大力唱好，話佢業績好掂。冠捷比起其他工業股，股價一直企得好硬。早前一度急跌至4.40元的低位，但好快就升番上5元水平。噚日升1%，收5.15元。
慕容小初