六月時分，好多老友飛去美國，參加兒女嘅畢業典禮，順便在彼邦一遊。譬如李八方喺《蘋果》提起之機管局企業傳訊總監關太鄭麗敏（關越強太太）就係去加州，關公子在Foothill（社區學院）讀咗兩年，聽講憑好成績轉入一間私立名校，今年畢業咯。關公子有一樣嘢威水，就係佢到Foothill不久，就參加學生會競選，贏咗，成為學生會會長，咪話香港學生淨係識得讀書！
大闊佬鍾普洋前一輪飛咗去波士頓，重以為佢又係去參加女兒畢業禮，原來唔係，佢位千金喺四月份已經大學畢業，鍾先生去波士頓，係自己讀書，上訓練班，學習點樣開辦「企業家entrepreneur培訓課程」，鍾普洋PoChung，人稱阿Po，三十年前創立香港DHL，後來將啲股權賣咗畀德航與日航，成為億萬富豪，退休專搞藝術文化發展，係最高級嘅義工。呢次去波士頓上課，有乜目的呢？據佢位老友記講：「阿Po認為人貴自立，中國人天生生意頭腦，勤奮耐勞，只要能夠扶佢哋一把，教曉佢哋點樣創業，佢哋就會自食其力，獨立做人。阿Po去上堂取經，認為非常有用，預備到內地開辦企業家培訓課程，為中國發掘未來企業家！」
香港多一啲阿Po呢類嘅大有錢佬，社會會和諧一啲，阿Po從來不口出惡言，不批評他人，只係捐錢出力，為慈善團體、文化藝術發展而努力，兼且低調唔出風頭，直情係左丁山嘅偶像。