鄧小平同美國總統喬治布殊噚日喺香港會面？八方唔係講緊天方夜譚，其實係專科扮鄧小平嘅大陸男演員盧奇，噚日去咗山頂蠟像館同一大堆蠟像合照留念啫。
盧奇今次嚟香港係為咗宣傳新片《鄧小平》，片中佢繼續係扮鄧小平。盧奇話佢由八八年開始接戲，已經拍咗三十幾套片，套套都係扮鄧小平，當中有《開國大典》同《周恩來》等。佢話自己從來未曾同鄧小平見過面，不過鄧小平個仔鄧樸方曾經打過電話畀佢，讚佢扮得神似喎。盧奇又話自己最似鄧小平嘅地方係輪廓，但喺化妝方面都要做少少功夫，不過鄧小平嘅器度同風采就好難學到咁話！而本來唔食煙嘅佢，為咗令自己同鄧小平接近啲，重變為超級大煙鏟㖭。至於老鄧另一隻吐痰癖，就唔知盧奇學唔學得似嘞。
傳真︰2623-9278
電郵︰