七一大遊行，可以嗌乜嘢口號，唔可以嗌乜，經已成為中方同民主派爭拗嘅熱點。
嗌「打倒胡溫」固然係唔畀面，嗌「結束一黨專政」又話會「觸動中央神經」，嗌「還政於民」就即是搞港獨，嗌「董建華下台」即是顛覆特區政府，嗌「堅決要求○七○八普選」？又係搞「半獨立政治實體」，剩番嘅，就只係得「進食前記得要洗手」、「如廁後一定要沖水」同埋「馬路如虎口、交通規則要遵守」等一連串有關「民生」嘅訴求宣傳，可以由長毛李卓人帶頭高呼，先至叫做中央可以勉強接受嘞。
嗌口號，有名畀你叫，不過係止於一個「口」字，若然嗌口號係有效，中方自己幾十年猛嗌「打倒美帝國主義」，點知人哋美帝一日強大過一日，𠵱家自己都要靠美帝開放市場嚟養活廉價勞工；中方亦猛嗌過「我們一定要解放台灣」，今時今日，台灣不但未遭「解放」，反而台商投資中國，製造大量就業機會，係解放緊啲農村盲流㖭。
前布政司鍾逸傑爵士，昨日主持回憶錄《石點頭》嘅發布會，亦叫民主派唔好撩中方，停止呼叫「還政於民」。鍾叔一臉慈祥，滿懷善意，就好似一個老伯伯，見到一個三歲幼童喺街邊不斷伸隻手去搞一隻目露兇光、喉嚨發出緊一陣「胡胡胡」模糊聲音嘅北京沙皮一樣，叫個細路唔好咁「曳曳」，縮番隻手，若果唔係就會好痛痛嘅嘞咁講。
不過主教陳日君就代表梵蒂岡嘅教宗，向全港六百萬市民發出指示：叫「還政於民」亦係言論自由嘅一種，並呼籲包括政務司司長曾蔭權在內嘅天主教徒七一大遊行。
呢兩類咁有代表性嘅意見，市民都可以參考。喺呢個時候，香港要多啲好似鍾叔、陳日君呢一類政教元老，出嚟講一啲智慧名言，好似鍾叔咁，佢回應中國外長李肇星較早時嘅挑釁話「點解英國管治時又沒有給香港民主」，就好得體咁反擊：「一九七一年，中國在聯合國將香港排除在殖民地名單外，一九六七年暴動發生完冇幾耐，中國正在文化大
連特區政府嘅行政會議核心人物、中央政策組首席話事人劉兆佳都鼓勵市民七一大遊行，話「特區政府已經接受遊行示威是表達意見的正當方式」，為響應佳哥，香港人係咪要畀啲善意，七一齊齊出嚟散吓步，慶祝吓老布殊八十大壽、哀悼列根，同埋紀念諾曼第登陸對邪惡帝國大反攻六十周年先？
（圖）設計圖片
傳真︰2623-9278
電郵︰