一國兩制研究中心噚晚喺會展新翼大會堂舉行《鄧小平》電影首映禮，為中心籌款。老鄧呢塊招牌一啲都唔便宜，戲飛由一千蚊到五千大元一張，城中名人當然唔敢唔捧場。
田北俊、吳光正、榮智健同和廣北等好大手筆，包咗成行飛，政制事務局局長林瑞麟亦好識做，買咗五千蚊張嘅飛。不過特首董建華嘅致辭，真係聽到人毛管戙，話𠵱家重溫鄧公事迹正合時宜，睇戲時祖國嘅關懷同領導人嘅期望歷歷在目，鞭策自己做得更好。
八方就認為乜都假，最緊要記得老鄧話過，九七後台灣機構仍可在港宣傳三民主義同罵共產黨，重話共產黨不怕罵，亦罵不倒。𠵱家老鄧嘅接班人以至梁振英之流就乜都叫香港人唔好講，唔好同中央作對，真係忘記晒老人家嘅遺訓！
（圖）阿董（右三）出席《鄧小平》電影首映禮，講嘢難頂。
傳真︰2623-9278
電郵︰