「要票嘛？……兩百塊，便宜了！」、「今天的，記者證，一千塊……」炒黃牛嘅男人未講完，已經有一大班人喺北京車展門口以高價圍住佢買一張正價只係50蚊人民幣嘅入場券，36℃嘅高溫下，場外嘅人依然願意不惜金錢，爭住入場睇名車、低胸短裙、攞紀念品，場內嘅亦有一班揮金如土嘅豪客，其中有另一位「奇人」就以天價988萬元人民幣訂走一部賓利雅致728，大陸人有錢，但願將來個個都係。
記者、攝影：朱維達
今次採訪北京車展最難忘嘅除咗當地人一擲千金嘅豪氣，場內展出嘅新車亦令我對大陸車改觀，其實大陸出品一啲都唔老土（或者我一直都孤陋寡聞），而且重有好多花巧嘢玩，夾埋歐洲其他品牌嘅車系，真係幾日都講唔晒！
喺場外眾多紅色計程車同包廂車中突然發現泊喺車展門口有一部檸檬「獵獸」，呢部獵獸完全係前衞與古老嘅混合體，車身仿50年代嘅老爺車設計，但內裏性能就十足一部超級跑車，聽聞呢架名為獵獸嘅「雙體車」已經絕版，喺美國同加拿大重不斷升值㖭！
呢部奇瑞鋪埋白毛氈認真出位！除咗成部車身都係用上賤兔白毛氈做裝飾，就連車廂都係襯埋一set賤兔公仔。呢款QQ喺三月份推出1.1L同0.8L，前者擁有多點式電噴發動機、耗油量4.4L/100km，後者為DOHC多點式電噴發動機，耗油量少0.2L，同屬5前速手動波箱。
初時重以為架車未做完就出廠，原來係全新全身鋁製轎車，強度比上一代堅硬60%，重量輕200千克，為阻抗撞擊引致嘅凹痕帶來較佳嘅恢復力，配備埋停車雷達、12向電動調校真皮座椅、導航控制、增強型CATS（電腦主動懸掛架），成為新一代至In轎車王！
雖然係一部四人細車，但闊達2300mm嘅軸距堪稱為同級之最，車內有溫度顯示等設備，4前速波箱極速只得130km/h，但勝在耗油量低（少於5L/100km），最搞嘢係個功夫佬紋身，加埋啲招式連毛筆字，似藝術品多過部家庭車。
今次北京車展請咗好多曾經喺各模特兒比賽入選或得獎者做新車嘅model，以下只係冰山一角！
北京車展有成10個展館，幾十個品牌各自有獨立嘅展場，真係與同場嘅模特兒一樣，令人花多眼亂，其實當中都有重點推介，好似去年都有參加北京車展嘅賓利Bentley咁，今次除咗展出雅致R、RL同728之外，更於國內首度公開最新豪華轎跑車歐陸GT（4部展覽車車價合共已逾2,000萬元人民幣），無他，皆因早前喺大陸嘅銷情出奇咁好，今次決定食住條水推出GT，並以298萬元人民幣「誘人價格」推銷，正如賓利銷售及市場部委員MrHallmark話：
「上次北京車展，賓利以價值888萬人民幣嘅728成功打入大陸市場，連同長陣雅致成為賓利去年嘅銷量冠軍；今次為推出全新嘅GT雙門轎跑車，更提早年初喺北京、上海同深圳作私人預展，反應超出想像，3個星期就訂出超過80部……我哋將來嘅目標，係將現時嘅經銷商數目增至8個，以配合中國經濟發展。」
如果你睇完以上阿Hallmark講嘅說話好似事不關己咁（反正四部喺今次車展展出嘅豪轎香港都見過），無相干，因為同場我亦即時「捉住」麥炯添董事做訪問，過程中不斷追問有關賓利喺香港未來嘅動作：
Q：有無諗過將賓利改頭換面或減價以吸引更多香港買家？
A：唔會，賓利嘅銷售對象係一班富豪商家有錢人，就算變亦只會繼續喺貴格轎房車嘅DNA下蛻變，更加唔會有太大減幅，否則就失去賓利原有嘅市場位置。
Q：去年香港賣咗16部賓利，你有無覺得香港嘅市場已經飽和？
A：其實銷售額唔可以單從賣出幾多部嚟衡量，經過大幅增加稅項及去年沙士後都有呢個銷量已經係唔錯，而且香港market一直喺亞洲佔有主導地位，相信喺經濟慢慢好轉嘅情況下銷量亦會同步上升。
Q：最快會有邊款最新型號嘅賓利喺香港推出？
A：點解你咁有興趣想知道香港嘅market？哈哈哈……唔，嚟緊7月會有部Arnagefacelifted版，外形轉咗，變得較為sporty啲，無咗舊版嘅直燈，加咗多啲桃木裝飾等，到時再請你去試車！（Hoo！又有新車坐！）
