大市低開後掉頭向上，中午前恒指由低位回升百幾點，買恒指Call輪博反彈，應該賺到餐晏。不過，12點過後個市又跌過，午後賣地成績合乎預期，對市況冇乜刺激，埋單計數，恒指再跌25點。
今次賣地，由小甜甜投得，成交價接近市場預期上限，照計點都有多少利好作用，只不過市場焦點𠵱家放喺息口之上，賣地嘅利好消息未得以反映。美國昨晚公布消費物價指數，若然數值並非太高，加息恐懼便可紓緩，個市有機會做番好啲。
賣地成績雖然唔錯，新地（016）未有得益，股價微挫1格，收報63.50元。新地月初低位62.25元，250線喺62.70元，見到呢啲水位，可以買些少新地Call輪短炒。
話明短炒，梗係要揀交投旺易轉身嘅，對象有9977同9391。9977玩到10月29日，溢價13.8%，槓桿率15.9倍；9391壽命去到12月13日，溢價9.9%，槓桿率10.8倍。
長和系近期有唔少消息喺市場流傳，似乎係好事多過壞事，賣地成績好，對長實（001）亦有利，長實Call輪可見低收集。
長實Call輪對象亦有兩件，9973今年11月1日到期，溢價12.4%，槓桿率14.9倍。另1件係9227，玩到11月10日，溢價9.6%較低，槓桿率11.5倍亦較細。
章盛