日本性感女星佐藤江梨子主演嘅科幻動作片《CutieHoney》，上個月尾喺日本上映時反應唔錯，套片啱啱出咗製作特輯《MakingOfCutieHoney》DVD，入面睇到江梨子瞓身嘅演出，除咗親身上陣拍攝爆炸場面之外，亦有唔少香豔鏡頭㖭。
喺隻DVD入面，我哋可以見到佐藤江梨子拍攝《CutieHoney》嗰陣有幾投入同認真。雖然佢已經係日本水着界一姐，但係開工嗰陣，佢一啲都唔擺款，成日都同啲工作人員打晒招呼，收工嗰陣又會同攝製隊鞠番個躬，真係好有禮貌。
我大口羅拉真係估唔到江梨子拍戲嗰時都咁聽教聽話，除咗好留心聽導演庵野秀明嘅指導去演戲外，重埋首研究劇本，到拍攝高危爆炸場面嗰陣，佢都堅持親身上陣。
當然性感先至係江梨子嘅強項，導演亦冇埋沒江梨子嘅美好身材，有幾幕特登要佢瞓喺浴缸度沖泡泡浴，相當香豔。包住浴巾嘅江梨子重好搞笑咁喺鏡頭前揭起塊浴巾驗胸，真係引死fans。
而新一期日本雜誌《女性自身》就爆料，話江梨子拍攝《CutieHoney》嗰陣身材咁弗，原來係靠飲豆漿減肥，相信未來將會有唔少日本女士爭相仿效。