薄扶林貝沙灣唔單止吸引投資者，連內地客都好有興趣。香港置業高級營業經理夏笑笑話，剛有一名內地廠家，派下屬專程來港，用二千一百五十萬，購入貝沙灣三期三座中層B，二五六○呎，呎價近八千四。
呢個內地廠家五月中落嚟香港，睇過貝沙灣及淺水灣樓盤，鍾意貝沙灣多啲，但揸唔定主意而未有入市，後嚟見上月底賣地成績好，喺噚日第二次賣地前趁早入市，派下屬來港，落實購買心水單位。
買家喺內地生產音響器材，並透過香港出口外國，之前在港只持有寫字樓單位，今次買貝沙灣，係諗住自住。夏笑笑透露，買家係由公司舊客介紹。
貝沙灣本月有八宗買賣，與上月差唔多，主要係整體豪宅市況放緩，買家觀望賣地結果才作決。
喺香港潛水好多年嘅爪哇控股，最近開始蠢蠢欲動，繼之前與恒基合作嘅上水吳屋村住宅項目，與政府完成補地價後，諗緊再買地，好似政府舉行兩次土地拍賣，都見到佢哋蹤影。上月拍地會上，當拍賣沙田銅鑼灣山路地皮時，更手執十號牌，同各大發展商「鍊過」。但只係承咗第五口、第十口同第十七口價，到五億五千五百萬後，就放棄角逐。
物業管理公司近年注重環保之餘，又加強社區服務，信和物業管理嘅四十個屋苑，早前辦「環保捐衣助貧困---舊衣物回收運動」，一個月內收集到近三萬四公斤衣物，送予救世軍，轉贈畀有需要人士。
原來信和今年已經係第三年聯同救世軍搞呢類活動。住戶可以騰出空間，捐出嘅衣物，又可幫到人，實是一舉兩得。
上環一啲冷門商廈，原來唔少捧場客，中原高級營業經理陳叔仲話，皇后大道中一八四至一九二號恒隆大廈，三樓全層，業主本來諗住裝修靚個單位，然後出租，點知有客好想買，出價又吸引，所以最後都係抵受唔住誘惑，出售獲利。
個單位係三樓全層，三八九三呎，以四百二萬售出，呎價一○七九。
佢三月用三百三萬買入，估計出租回報有五六厘，現時轉手賺九十萬，約兩成七，難怪放棄收租念頭。
買家從事貿易生意，買嚟自用，原因係單位幾實用，實用率逾七成。同區同類商廈，一般都係二千零呎，少有逾三千呎供應。
政府噚日賣地，吸引唔少發展商出席，寫字樓設於中環嘅南豐集團，財務董事張華清與發展項目總監蔡宏興，揀咗最經濟實惠嘅方法，齊齊搭船過海，去尖沙嘴文化中心拍賣場觀戰。
兩位原本都好低調，但喺碼頭俾記者撞見，記者梗係跟埋搭船過海，趁機做訪問。兩人雖然冇咩特別嘢想講，不過因為冇得走，惟有坐定定答問題。
蘭西
電郵地址：
