香港旅遊業得自由行輸血興旺，噚日署理政府經濟顧問茅以麗喺立法會講經濟情況時，都有提到呢點。當然，毫無意外，增長最勁嘅梗係大陸同胞啦。至於以前好捧香港場嘅日本，近月遊客數字錄得雙位數跌幅，有議員問司長唐英年，「點解會少咁多呢？呢個到底係香港嘅問題，抑或係旅客本身嘅問題？」
唐司長解釋，話相信主要係日本遊客都好敏感，舊年有沙士，今年又有雞瘟，可能日本遊客幾「蛇騎」。不過「蛇騎」呢兩個字，其實都唔係咁好聽，於是緊隨其後發言嘅吳亮星議員，立即「更正」司長嘅說法，認為司長應該係話日本遊客「珍惜生命，愛好衞生」。同司長補鑊兼擦㗎仔鞋，乜都係假，若然有錢帶挈，點解唔做？
傳真︰2623-9278
電郵︰