一年一度抽馬（即抽籤做馬主）結果已經揭曉，一睇之下，馬主H、馬主N都大失所望，因為佢兩個私人入飛，抽唔到之餘，佢兩個嘅團體（syndicate）亦抽唔中。馬主H有兩張團體飛、一張私人飛，全部落敗，為之垂頭喪氣。有人失意，有人得意，一啲馬場稀客，一擊即中，令人羨慕到極。
馬主H嘆曰：「我咁熱心賽馬，逢跑馬必到，抽唔到新馬，實在打擊士氣，希望抽得中嘅幸運兒唔好淨係掛住打高爾夫，自己隻馬冇出賽都去吓沙田、快活谷捧場啦。」好難咯，唔少馬主鍾意高爾夫多過賽馬，自己隻馬冇報名出賽嘅話，多數逢星期六日就去深圳、中山打高爾夫，邊度得閒入沙田馬場吖！現今賽馬投注不斷下跌，入場人數少晒，與馬主、馬會會員寧願打波，唔去馬場請客，好有關係，你估個個都係馬主H咁蠢，硬係要做馬場擁躉咩。
賓架C去年受唔住馬販游說，買入一隻兩歲馬，出自GeneralNediym，與「力勝」同父系，母親就係名種「丹山」之女。睇血統就有料到啦，賓架C於是召集幾位死黨夾錢買咗隻馬，組成syndicate，點知今次抽馬冇晒行，班死黨私人方面亦冇個抽中，今勻唞唞咯，隻新馬留喺澳洲跑，獎金好少，條數計唔掂，一時不知如何是好。