個市走勢真係難測，上晝恒指微跌34點，下晝再散285點，全日埋單唔見319點，全日高低波幅485點，非常厲害，啲Call輪有放大效應，可以由升10%變跌20%。下晝三點買嘢，到收市時已經中招。
恒指收12076，又再考驗萬二大關，最低曾見12053，而即月期指則曾觸及萬二齊頭。今日賣地，相信成績唔差，恒指再試萬二，可細細注揸恒指Call輪博反彈。對象有3件，9773、9788同9799，全部都係9月尾到期。9773輪價12.5仙，溢價5.1%，槓桿率17.6倍；9788輪價11.5仙，溢價4.9%，槓桿率18.2倍；9799輪價12.6仙，溢價4.2%，槓桿率15.5倍。
滙控（005）跌2元，拖低恒指71點。恒指若要守穩萬二點，滙控有必要唔好再跌。滙控近期幾蚊上落，相對於其他藍籌例如電訊股或地產股，波幅唔算大，不過啲輪隻隻都有好高嘅槓桿率，所以波幅放大得好厲害，例如9783，收76仙，散16.5%。博滙控反彈，呢件吼得過，數據靚，9月尾到期，溢價只係1.4%，槓桿率15.3倍。
搏殺格，則揀9640，9月初到期，輪價52仙，溢價3.6%，槓桿率22.3倍。要留意，萬一正股唔係升得太多，則9783會跑贏9640。若然正股唔對辦，則9640跌幅會勁過9783好多。滙控Call輪槓桿率好勁，炒作注碼咪太重。
章盛