港股噚日大玩過山車，早上升逾百點，突破12500，午後則急挫，連12100關口都失守，恒指收報12076，跌319點，成交達148.57億元。國企指數更挫逾3%。
市場傳出國內一間大型投資集團在股市沽貨套現，可能和銀行追數有關，令投資者擔心會出現銀行四圍追數的連鎖反應。至於人行加息之說，其實只是藉口，從最近國內官員的口風看來，中央根本唔想加息。另外，標普期指下跌，市場似乎預期美股周一亦會下跌。
在賣地前夕，一波出報告唱淡地產股，並即時調低多隻地產股目標價，縱使珀麗灣賣得唔錯，新地（016）仍跌2.7%，恒地（012）跌1.8%，長實（001）更挫3.8%。一波將新地目標價調低6.79%至75.50元，並將恒地及長實目標價調低逾9%，分別降至48元及72.50元。
今日拍賣的沙浦道地皮，市場預期成交價上限為11億元，呎價高達3225元。由於上次賣地被市場認為價錢偏高，若今日賣地仍獲地產商高價競投，則市場便要承認高地價時代再來臨。呢個地產項目規模唔算大，但對樓市走勢有舉足輕重的作用。若然地產商今日放軟手腳，本港樓市可能要繼續調整。
前身是彩虹國際的變靚Ｄ控股（8079），噚日復牌表現一Ｄ都唔靚，股價一度大跌78.7%至1.6仙，收報4.3仙，仍大跌42.7%。此股經過重組，資產淨值由負數變為正數，但只得10萬元咁大把，相信日後會有好多抽水活動。
曼盛生物（512）停牌，市傳大股東將提出全面收購。
阿虎