為求與中方「溝通」，民主派要除衫瞓身到咩嘢程度，中方先至滿意，經已成為特區繼「陳壽山」同飛哥喺午夜凶鈴之中作出咩嘢嘅恐嚇內容之後，又一至Hit燈謎遊戲嘞。
劉千石首先獻身，作出「善意回應」，話若然有普選，佢會考慮投票畀共黨，遭到長毛怒斥佢冇腰骨。
長毛又冇鬧錯。劉千石係工會代表，至叻就係同無產階級草根勞工追討欠薪，今時今日嘅中國共黨，國企改革，基建工程，到處欠落工資唔還，搞到連溫家寶都要親自同民工追討欠薪，劉千石投票支持一個咁嘅黨，即是鼓勵殘酷剝削，若然唔係具有國際工運知識嘅長毛喝住佢，劉千石分分鐘同佢嘅同宗老爺劉少奇睇齊，做咗民主派嘅「叛徒內奸」之外，重淪為「工賊」㖭。
劉千石有冇估錯中方燈謎就未知，愛國愛黨精忠報江嘅阿董，亦飛身參加競猜，話想「溝通」咩，中方希望司徒華等人識做，「心知肚明」，自己解散支聯會。點知話口未完，中方外交部駐港特派員楊文昌就話：中方冇提及要解散某啲特定組織，無形中摑咗我哋阿董一巴。
不過又難怪好多土共揣摸錯咗上意。港澳辦左耳陳對六四「黃雀行動」重係好仇恨，大罵支聯會有「顛覆祖國」前科（查實「黃雀行動」係本港江湖俠義界人間嘅壯舉，今時今日，人哋一早同大陸公安揸扒做兄弟，生意亦一早登陸廣東），左耳陳今次咬牙切齒，好易又嚇到人哋撤資，即是話無論支聯會解唔解散，共產黨有啲嘢一世都記住。
咁究竟支聯會應唔應該解散？熟悉投資中國嘅市場人士分析：若然𠵱家解散支聯會，就係自己老襯，因為唔排除最近中南海就六四「平反」問題，暗中開始一場「黑白雙獅競採青」嘅角力比賽。有關方面嘅有勢力人士開始領悟到，與其乜都唔做，任由胡溫他日去「平反」六四攞彩，不如爭先主導，由自己或自己條線隻馬嚟搶先平反。就好似兩條獅採青咁，要爭領到封利是先。
所以近期有啲另類中方喉舌，爆出「李鵬寫回憶錄」話自己同六四冇關，跟住又話老江下令攝製「六四光碟」內部公布真相，人人都聲稱唔關自己事，指證屠城血手原來係楊尚昆細佬楊白冰等。傳言多多，暗流洶湧，即是話開始有少少行雷閃電，「六四」呢副棺材，塊蓋開始郁一郁，好快就會蓋板打開，再加上有隻黑貓跳一跳過，產生靜電效應，就會發生屍變。
若然係齋噴口水，冇同大陸民運打龍通，中方有關勢力，反而可能望香港支聯會唔好解散住，留低少少火頭。「六四」喺大陸，經已冇乜人記得，喺海外不斷咁提住，以備有朝一日裏應外合都未定，呢啲就係香港對大陸政局嘅微妙作用，頭腦簡單淨係識瘋狂「愛國」嘅老左又點會知？
阿董想支聯會散班，即是未經阿爺批准，將六四開始鬆動嘅棺材板，自己又上釘釘到冚，搞到祖國真係唔知錫佢好定嬲佢好。都係司徒華精靈啲。其實，今年六四燭光會有八萬人，電視訪問中聯辦副主任李剛，六四係乜「性質」，佢都一句不提，只係話「穩定最重要」喇。收到未呀，成班懵B。
傳真︰2623-9278
電郵︰