日本歌手松田聖子，前日喺日本開始咗佢嘅全國巡迴演唱會。雖然聖子姐已經四十二歲，但佢一身粉黃色連身短裙嘅打扮，喺一萬五千多名觀眾面前又唱又跳，一啲都唔輸畀𠵱家啲偶像妹妹仔。喺演唱會中段，聖子姐重不避嫌咁搵咗同佢傳緊緋聞嘅原田真二，代替石橋貴明，同佢合唱嚟緊下月七號推出嘅新歌㖭。