呢兩星期嘅鞋市的確水盡鵝飛，可能係歐洲國家盃開波，各大品牌集中推銷波衫，波衫舖生意好到不得了，同波鞋舖真係差好遠。
講開又講，今年一剔牌和三間牌的落場版波衫真係唔靚，我就買咗件豹牌意大利波衫，上面印咗「神奇小辮子」名同號碼以作留念，但係啲料好差，布面好易起毛粒；建議購買時請睇清楚兼着完用手洗，否則大嗱嗱七嚿幾水（衫連印字）就凍過水！
講番波鞋，呢兩星期最勁就係一剔的「卡克登」，發售前一晚已有人排隊，點知之後各大連鎖店陸續返貨，重係唔少嗰隻，之後美國水貨一到就一定水浸，相信會令不少炒行貨的炒家坐艇。一剔香港今次算是德政，令想買的人唔使捱貴貨，氣都順晒！
AJ19低筒版無聲無息上市，個人嚟講好唔鍾意；感覺只係將三代現代化炒埋一碟。同某波鞋連鎖店老闆傾偈，佢話無論AJ19黑色同低筒版都賣得唔好；而預計會大賣的四代和七代奧運版又未必返到好多貨，真係生意難做。
題外話兩則：一、NBA中國賽就快有飛賣，票價係由人民幣一百八十八蚊的超山頂位到兩萬蚊的「bench」（後備席後面）位，最多位則係千八蚊的山頂「電視位」，如果火箭帝王fullteam上陣都值嘅。二、公牛和湖人王朝的DVD已上市，此兩套DVD小弟與仙道彬已日煲夜煲（公牛隻碟全長十五個鐘！），可以講係籃球迷必備佳品，各大一區DVD店有售。
最後講多句：BEATLA！
Hleung-波鞋網站
頭目，最愛佐敦同柏賓，最怕寫字。
Email: