第七屆上海電影節前晚播埋張曼玉套《Clean》做閉幕電影，再開埋個酒會後，就真正曲終人散，但睇番嗰份上海電影節嘅簡介，先知原來曾志偉同王家衞開戲鬧雙胞！
電影節裏面有份叫《上海電影推廣會》嘅簡介，介紹嚟緊啲知名導演有興趣搞乜嘢戲，主要講嚟係吸引投資者。喺今年份簡介裏面，有部叫《花團錦簇》嘅戲，準備05年賀歲檔上，由曾志偉監製、文雋策劃、區丁平導演、趙薇主演，故事係講周璇、阮玲玉同蝴蝶嘅故事，馮仁昭八到話曾志偉開嗰部《江湖》蝕本，所以想開番部女人戲轉吓風格，會由趙薇做「金嗓子」周璇、舒淇做阮玲玉，不過噚日舒淇同馮仁昭講，話文雋只係提過吓呢部戲。
但咁啱得咁蹺，簡介裏面重寫咗王家衞都會開部叫《周璇》嘅戲，講周璇嘅一生，不過就冇列明主演者，亦都打算喺05年春節上，真係可以話由人物到映期都撞到正。
簡介重列咗由周曉文導演、舒淇同葛優主演嘅《紅顏》、關錦鵬部《長恨歌》同埋陳可辛導演嘅《歌舞昇平愛頌來》，陳可辛部戲重投資成四千萬㖭。
林子祥（阿Lam）噚日到港台做訪問，就嚟到父親節，記者就問阿Lam啲仔女點同佢慶祝，阿Lam話：「我啱啱先去完澳紐登台，順便去見吓啲仔女，原來我個仔同個女都拍拖，我個女重同個鬼仔拍拖，不過都冇乜所謂，我同佢講最緊要小心啲。」馮仁昭問佢點慶祝父親節，佢反而講吓自己仔女啲生活，父愛真係表露無遺。
蕭正楠噚日喺灣仔出席「蜘蛛俠2概念跑車」製作過程活動，大會重專登搵嚟一部迷你版嘅林寶堅尼做蜘蛛俠嘅概念跑車㖭，蕭正楠話都想擁有一部好似呢類咁型嘅跑車，問到佢係咪用車嚟追女仔，蕭正楠就話：「我都希望自己三十歲後可以有一部，呢啲車個個女仔見到都好難抗拒㗎！」咁佢咪即係默認「以車𠝹女」？
伍詠薇噚日喺將軍澳電視廣播城為無綫劇集《灰色軌跡》開工，佢話拍到月尾就拍晒，因為成班演員嘅感情都好好，所以佢都好唔捨得，特別係同戲中飾演佢個女嘅童星，因為拍呢套劇之後覺得自己原來好有母愛，佢話：「佢每次一叫我做媽咪，我就成個人都軟晒，好冧呀！」
