富豪鄭裕彤、問責高官馬時亨同葉澍堃、立會議員梁劉柔芬、四姨太梁安琪以至久未露面嘅羅德丞等政經界要人，噚晚都去晒紅館睇歌神許冠傑（阿Sam）嘅演唱會。
彤叔着晒西裝，同埋一班朋友一行六、七人大約七點五十分喺後台入場。彤叔係演唱會稀客，阿Sam行過亦都好禮貌咁同佢打招呼。呢場演唱會起碼睇四粒鐘，好彩彤叔平時都有做運動，相信夠晒精力去應付。
至於馬時亨，八方誤報佢上星期六去咗盈保之夜，原來佢冇去，噚晚先至相約咗葉澍堃同林健鋒一齊去懷舊一番。
阿Sam演唱會飛難撲，連涂謹申都四周搵飛。阿涂原來係阿Sam迷，十二年前同太太剛結婚，就把臂去睇許冠傑告別演唱會，今次佢掛住做嘢，連八月飛開買都唔記得去排隊，𠵱家等吓有冇人有得出讓啦。
傳真︰2623-9278
電郵︰