又嚟一鋪。恒指噚日上晝重好穩定，下晝一開市，面目全非，結果大跌成320點，重大劑過早幾日嗰鋪。
噚日個勢，曳到極，穿頭破腳，恒指早段上到12538，創出今次反彈新高，但午後在期指帶動下，愈插愈急，10日線（12216）應聲而穿，最低落到12053，連50日線（12096）都穿埋，收市12076，成交更大增到148億元。期指尾市重係一路插住，低收12010，大低水66點，氣氛認真麻麻。
一次又一次，莫非都係狼來了？上一次急跌後，隔一日，就大幅反彈，今次又如何？噚日咁跌，短期個勢已轉壞，但有可能係行番上次條路；至於中長線，個勢冇變，重係睇好。
大市呢兩個月來形成嘅複式頭肩底，只要守得住上次低位（11845）同大型島嶼嘅裂口（11701-11839）之上，形態未被破壞，對後市有信心，呢一鋪又係另一次低位買入嘅機會。個人估計，今次調整，會持續兩三日，恒指在11800水平應該守得住。
個市失驚無神咁跌，消息自然滿天飛，大部份都係同內地有關，有話證券公司造市，又有話大公司唔掂，涉及嘅錢銀，重係天文數字；其實，個市要跌，消息只係藉口，人為因素大於一切，今次估計亦係震倉居多。
加息係大趨勢，家下美國同中國嘅利率走向，都一路俾人做文章。美國呢輪經濟數據表現好勁，月底加息0.25厘，幾乎已係定局，而到今年底，保守估計亦會加多兩次，不過，市場早已預咗。至於中國，噚日亦有報道傳短期內會加息，引致內地股市急挫（A股跌2%、B股跌8%），但下晝有關方面已澄清暫時未有加息計劃。
國企亦全面下跌，大多跌幅由3%至6%不等，國指收4241，跌139點，跌幅3.2%，大行有買有賣，唔見有大動作，最硬淨係兗煤（1171），早段曾升上8.5元的高價，後低收8.2元，仍升0.1元。大行現時重係揸重國企，睇個勢，佢哋重會一路增持，好似兗煤、幾隻化工股、同埋江銅（358）、中鋁（2600），以及海螺（914）等，都係佢哋一路收集嘅對象，短線調整冇所謂，個市一就，掃番兩轉，好快就收復失地。
郭兆誠