Yumiko生擒陳奕迅濕吻三分鐘

由陳奕迅（Eason）與鄭希怡（Yumiko）主演的《重案黐孖Gun》將於本月尾上映，Eason與Yumiko在片中有多場大膽的熱吻戲，其中Yumiko為證明自己的魅力，在車廂內色誘Eason，繼而濕吻的戲份，便咀足三分鐘，場面香豔。

陳奕迅和鄭希怡主演的新片《重案黐孖Gun》即將上映，二人在片中有不少火辣辣的親熱場面，其中最激的一場莫過於講述Yumiko被前男友拋棄，在心情極度低落之際，色誘Eason以證明自己的魅力而在車廂內激烈擁吻。有靚女送上門，Eason當然不會放過機會，二人更在狹窄的車廂中咀足三分鐘。

似拍動作片
雖然不止一次與Eason拍接吻戲，但Yumiko埋位前卻表現得相當緊張，她說：「雖然唔係第一次同Eason咀，但我都做足準備工夫，食香口膠之餘重刷埋牙㖭！加上今次係話我失戀，心情極度低落，要霸王硬上弓咀Eason去證明自己嘅魅力，所以要好激、好狼死同好擒青咁，搞到似拍動作片多過拍親熱戲。」

搞氣氛緩和
而Eason則笑說：「呢場戲我覺得自己係俾Yumiko蹂躪，佢失戀就屈我鍾意佢，重要我照顧佢一生一世，不過有女自動送上門就梗係殺咗先啦！」而Eason見Yumiko表現緊張即大搞氣氛緩和，在拍攝前更刻意將舌頭伸出來，嚇得Yumiko嘩嘩大叫。