舊區物業樓齡高，好多作價百萬有找，主要係地膽代理業務範圍，但中原竟然揀灣仔呢個舊區，喺莊士敦道開舖，實行「大雞食埋細米」。
中原營業董事何偉強話，根據○一年人口普查，原來灣仔一帶，有超過四成業主，已經完成按揭供款，大把條件換樓，就連家庭入息都高過人，逾半數家庭入息中位數近萬八，比全港中位數萬五高，可見灣仔有大班實力派買家，中原先咁有信心。原來舊區業主同住客好多係禾稈冚珍珠。
灣仔另一特點，就係有唔少重建項目進行得如火如荼，好似市建局莊士敦道項目就啱啱公布結果。何偉強又話，除咗有新盤將開賣，附近重有唔少豐儉由人嘅物業，真係唔憂做。所以噚日開舖只係一個開始，遲啲重會繼續喺灣仔及銅鑼灣開舖。
新地屯門聚康山莊，二月做完第一輪內購之後，等足四個月終於有聲氣再賣，噚日突然有動作，搵齊代理睇示範單位，市傳隨時賣得。
樓盤主打細單位，其中二座B室五八一呎示範單位，內櫳唔見使就在所難免，發展商要喺設計上花啲工夫，等個單位睇落大啲。於是拆廚房牆，改用玻璃，又拆分隔飯廳同浴室嘅牆，改成屏風，但遮唔晒成個浴室，煮飯同用膳之際，都可以睇到浴室，唔知買家是否接受到。
示範單位禮拜六、日開畀新地會會員，新地代理總經理周國賢話，價錢會同上一批差唔多，優質單位呎價二千六七。代理重話，鴨脷洲深灣軒好成功嘅首兩年免息供付款安排呢次都有，𠵱家就收到六七十張票。
豪宅價格舊年上升八九成，但原來商廈重勁，有五幢升值逾倍。
屋之島董事總經理黃志強話，二至四月唔少炒家購入商廈單位，然後摸出，推高造價。
呎價升逾一倍嘅港島甲級商廈，以上環信德中心最凌厲，由去年五月每呎二千四，升到上月五千三，幅度有一點二倍。
熱門炒盤金鐘力寶中心，呎價六千八，比去年同期高一點一倍，已經係五幢中升幅最細。其餘三幢升幅逾倍嘅，為中環皇后大道中九號、金鐘海富中心及統一中心。
舖王「波叔」鄧成波又再賣舖，剛沽出廣東道五十四A至六十六號地下E至G三個舖，共約二千五呎，賣價近二億一，每呎逾八萬三。
美聯商舖部營業董事盧展豪話，買家開玩具廠，一向投資住宅，今次首度進軍舖位市場。舖位現租予四個客，月收五十萬，回報不足三厘，但買家正物色新租客，估計新租值共約一百萬，回報可升至五厘七。
波叔趁市好頻頻出貨，計落今年賣咗超過十億舖位，唔少重係「倉底貨」。剛賣出呢件，喺九一年以四千二百萬買入。
蘭西
電郵地址：
